صوتى مش هوطيه؟رخامه

باى باى للبحث العلمى

2006-09-12T09:07:00.000-07:00

من كام يوم سمعت خبر لما سمعته ما عرفتش اعيط ولا اضحك . قال ايه فى اطار مكافحه الدوله لتقليل عدد الحاصلين على الماجستير والدكتوراة تقرر الاتى : المصاريف علشان تسجل تمهيدى ماجستير1450 جنيه وهى برضه لتسجيل الماجستير , و1800 لتسجيل درجه الدكتوراة . يا بلاش فعلا الحكومه تهتم بالبحث العلمى قووووووى مووووت . والنبى حد زى حلاتنا مش لاقى يا كل يدفع منين الفلوس دى ولا يعنى الى ما معهوش ما يلزموش . ولسه يا ما هنشوف

ليلى العامله

2006-09-11T11:52:00.000-07:00

فى البدايه احب اقول ان كلنا ليلى ليست ثورة على الرجل ولا نداء للخروج عن الشرع . بل هى فضفضه تخرج بها ليلى ما يؤرقها لربما يشعر بها ادم . المراة والرجل هما اساس المجتمع ولكل منها دورة فى الحياة . انا عن نفسى اعترف ان المراة فى بلدنا ليست مقهورة ولكن هناك بعض الاشياء التى كما قلت تريد ان تفضفض بها لكى يعرف ادم والمجتمع ما يزعجها. فلنستمع لفضفضتها ومن لايريد فليسد اذنه.
واليكم بعض ما يزعج ليلى

ليلى العامله

بالاضافه للضغوط التى تتعرض لها حواء العامله من تعب العمل وبهدله المواصلات .
المفروض انها ترجع من العمل علشان تعمل فى البيت وطبعا ترعى الاولاد بدون معاونه من زوجها . فتخيلوا الزوج دة لو ساعدها مساعدة بسيطه ايه الى هتشعر بيه حوا هتشعر بالحب والحنان الى هيجعلها تتحمل كل هذا التعب . فلو طلبت دة تبقى ثارت على العرف والتقاليد وهل بذلك تكون خرجت عن نطاق الشريعه ؟ والرد لا طبعا فالرسول صلى الله عليه وسلم كان يساعد اهل بيته . فهل سى ادم احسن من الرسول صلى الله عليه وسلم.
وهل خروج المراة لتحسين دخل اسرتها ولمساعده زوجها على تحمل اعباء الحياة غلطه منها . ماهى ممكن تقعد فى البيت وتقول هو ملزوم بكل شىء ولكن خروجها وتحمل الاعباء والضغوط يجب ان يشعر الرجل بالمسئوليه فى انه لزم يعاونها فى البيت . مش هقول يمسح ولا يغسل علشان الرجاله ما يزعلوش بس ممكن يساعد فى حاجات تانيه بسيطه تحافظ على برستيج حضرته.
وفى نقطه كمان هى ان الرجاله بيرموا اعباء الاولاد وتربيتهم على المراة ودليل على كدة بعض الالفاظ مثل انت ماعرفتيش تربى(طب ماتربى انت) , تعالى شوفى اولادك (مهم ولادك انت كمان ),الخخخخخخخخخ. دليل على ان الراجل فاكر ان الدور الى بيلعبه هو العمل والحصول على المال وعلى المراة ان تشاركه هذا الدور بالاضافه الى العمل فى المنزل وتربيه الاولاد.
بجد والله حرام .
انا لا اعمم لان فى رجاله بجد متعاونين وانا شوفتهم واعرفهم ولكن الاغلبيه ............... كدة.
http://laila-eg.blogspot.com

2006-09-10T09:23:00.000-07:00

صوتك ما يعلاش , اقعودى كويس, البسى جيبه انت عامله زى الراجل كدة ليه , امشى
عدل , اتكلمى كويس اية
الالفاظ دى انت ولد ولا ايه , انت مالك بالكورة , انت مالك بالسياسه , ايه الى بتتفرجى عليه دة اتعلمى اكله ولا حاجه تنفعك لما تتجوزى, كل الى قدك اتجوزوا ربنا يكرمك انت كمان انتبهى لمظهرك شويه هو العلم هيعملك ايه, مش مهم هى المهم اخوها هى بنت ومسيرها للجواز وراجل يصرف عليها لكن هو.... , وكلام تانى كتير بيتكرر كل يوم .كلام يجرح ويحسس ان البنت دى لازم تبقى تمثال صامته, مذوقه, لا تتكلم ولا تفكر بس الناس يتفرجوا ويقولوا يا سلام على الادب والاخلاق. النقطه الى بتنرفزنى بجد هى اهتمام بعض الناس بتعليم الاولاد عن البنات . انا شوفت مثال حى قدامى بنت وولد تؤم البنت جابت اكتر من الولد فى الثانويه العامه الاهل رغم انهم متعلمين قالوا للبنت ادخلى اى كليه انتظام مش انتساب علشان اخوكى هيدخل جامعه خاصه. البنت ثارت الكليه الى انا عايزاها انتساب .الاهل لا انت بنت مسيرك للبيت لكن هو ولد. مش عارفه يعنى لو البنت دى ما تجوزتش ولا جوزها مات ولا اطلقت تعيش ازاى . . دى نقطه مهمه نفسى اشوف الاهل يهتموا بتعليم البنت زى الولد .
http://laila-eg.blogspot.com

2006-09-05T14:19:00.000-07:00

ايه الخنقه دى . معقول هى دى بلادنا؟ الاهمال فى بلدنا بيحصد الغلابه والغلابه بس هما رضيين بالهم والهم مرضيش بيهم رضيوا بالقطارات الى يدوب تنقل البهايم وهى مارضيتش بيهم اتقلبت وقلبتهم معاها. . رضيوا بالعبارات المشحونه رضيوا يكدسوا زى السلمون فى العلبه لكن هى ما رضيتش بيهم وغرقت . رضيوا يعيشوا فى البيوت القديمه القابله للسقوط لكن اهى وقعت بيهم. رضيوا بالقمه العيش الحاف واهى شويه شويه مش هيلقوها. رضيوا بكل شىء قليل من باب القناعه كنز لا يفنى ولكن القناعه زهقت منهم وفنت.
. اول ما تحصل كارثه اول حاجه تقولها لنا الحكومه التعويضات كام الف للميت وكام الف للمصاب والناس من باب الى يجى منهم احسن منهم وميبقاش موت وخراب ديار بيسكتوا . مش عارفه احنا شعب وجبنا حكومه ولا حكومه جابت شعب.

2006-08-31T08:23:00.000-07:00

الله يرحمك يا عم نجيب

عم رمسيس

2006-08-31T07:55:00.000-07:00

الناس كلها بتقول ميدان رمسيس بقا وحش قوى من غير صاحبه عم رمسيس . انا نفسى اسال سؤال هل تمثال رمسيس يستحق انه يتصرف عليه 6 مليون جنيه والناس فى بلادنا مش لقيه تاكل ؟ هتقولوا التاريخ والتراث والى مالوش ماضى بيشترى ماضى وكدة يعنى . ماشى ماهو موجود بقاله سنين وفى اثار كتير قوى ومساجد محدش بيجى جنبها وبعضها وقع او هيقع ولا دى كمان مش ماضى . المهم كانو صرفوا السته مليون دول على الغلابه ولا عملوا مشروع يشغل كام الف شاب من الى ملطعين على القهاوى ولا كانوا عملوا بيهم مستشفى للغلابه ولا ولا... يعنى كان ممكن عم رمسيس يستنى وما يعزلش دلوقتى. لا والناس كانت فرحانه وبتجرى تتفرج يا ترى لو كانوا عارفين انه اتصرف عليه 6 مليون كانوا هيعملوا فيه ايه؟وعجبى

مالكوم اكس

2006-08-26T05:18:00.000-07:00

مالكوم اكس شخصيه لم اكن اعرفها من قبل عرفتها بالصدفه من فيلم على قناة 2 فحبيت اعرف اكتر عن هذا الرجل الذى اعتقد انه لم يسلط عليه الضوء كفايه والا كنا عرفناة زى ما احنا عرفين جيفارا. علشان كدة دورت وحبيت اكتب عن هذا الرجل لمن لا يعرفه.
ولد مالكوم في أوماها. عمل والده كواعظ و يعتقد أنة قتل على يد مجموعة من العنصريين البيض فنشأ مالكوم في هذه البيئة القائمة فشحن الفتى من صغره كرهًا وبغضًا على البيض وكل ما هو أبيض. تخرج مالكوم من الثانوية بتفوق و بحصوله على أعلى الدرجات بين زملائه و قد كان يطمح أن يصبح محامياً غير أنة لم يكمل تعليمه و ترك الدراسة بعد أن أخبره أحد المدرسين الذين كان يربطه بهم علاقة إحترام و تقدير متبادل أن حلمُه بالذهاب إلى كلية الحقوق بعيد كل البعد عن الواقع كونة زنجياً. فانتقل من مدينته إلى نيويورك حيث عاش حياة اللهووالفاسد والجريمة التي انتهت به إلى السجن قبل أن يبلغ العشرين من عمره وكان دخوله السجن نقطة تحول في حياته. التقى مالكوم في السجن بزميل له اسمه [بمبي] حثه على التفكير والنظر في الأشياء والقراءة فأثر في مالكوم قام مالكوم بتعليم نفسه بالسجن وقام على قراءة الكثير من المؤلفات خلال فترة السجن. بعثت اخت مالكوم برسالة له تتحدث فيها عن الديانة الا سلاميه وما لبث مالكوم ان اعتنق الاسلام والتحق بجماعة أمّة الاسلام. بعد أن خرج مالك من السجن قابل إليجا محمد زعيم حركة أمة الإسلام الذي توسم فيه الثورية والكره الشديد للبيض والقدرة الإقناعية العالية فضمه إلى مجلس إدارة الحركة وجعله وزيرًا [أي إمامًا] لمعبد رقم 7 بنيويورك فأبدى مالك كفاءة هائلة في الدعوة للحركة ومخاطبة الناس وزار الجامعات والحدائق والسجون، وأماكن التجمعات لدعوة الناس للإسلام، وأثر بحلاوة كلامه في الكثيرين فأسلموا على يديه، وفتحت له قنوات التلفاز أبوابها يعقد مناظرات على الهواء ويدعو لحركته. تنامت الفرقة بين مالكوم و الأب الروحي للأمة عندما اتضح ان اليجا محمد ضاجع 6 من سكرتيراته القصّر وحمل السكرتيرات حملاً غير شرعي وأصبح اليجا أباً لثمانية أبناء غير شرعيين. وأمر اليجا مالكوم بعدم التحدث بالمؤتمرات العامة بعدما وصف مالكوم حادثة اغتيال الرئيس كندي وصفاً لاذعاً، خصوصاً ان الرئيس الراحل كان محبوباً من قبل السود لتعاطفه معهم. ونتيجة عصيان مالكوم للأوامر واتساع الهوة بينه وبين الأمة، قام مالكوم على تأسيس منظمة منشقة عن أمة الاسلام وأسماها "مؤسسة المسجد الاسلامي" . بدأ مالك في طور جديد من حياته عندما قرأ كتابًا في تعاليم الإسلام وعن فريضة الحج فقدر أن يقوم بالحج وذلك سنة 1379 هـ ، وبالفعل ذهب لمكة المكرمة ، وقضى بها اثنى عشر يومًا وهاله ما رآه هناك من مسلمين بيض وسود كلهم على قلب رجل واحد وبينهم مساواة ومحبة وود وتعلم الصلاة الصحيحة التي كان يجهلها تمامًا، وفي زيارته قابل العديد من العلماء بالسعودية حتى أنه قابل الملك فيصل الذي قال له [أن حركة أمة الإسلام بها الكثير من الأخطاء التي تتعارض مع الإسلام] ودخل مصر والسودان والحجاز والتقى مع علمائها وقابل شيخ الأزهر ومفتي مصر حسنين مخلوف .وكانت الزيارة بمثابة حياة جديدة ، وبحث جديد له، فأعلن إسلامه من جديد وعاد لأمريكا ليبدأ مرحلة جديدة وخطيرة من حياته . بتنامي الخلافات بين مالكوم وأمة الاسلام، قامت الامة بإعطاء أوامرها بقتل مالكوم. فقامت مجموعة بإضرام النيران في بيت مالكوم الا ان النجاة قد كتبت لمالكوم وعائلته من النيران. وفي قاعة المؤتمرات في مدينة نيويورك(1965) وعندما كان مالكوم يلقي خطاباً في القاعة، حدثت أعمال شغب في القاعة. وفي محاولة من الحراس الشخصيين لمالكوم للسيطرة على الوضع، همّ رجل بالإقتراب من المنصة واطلاق النار على مالكوم وأصابه في صدره وبعدها تقدم رجلان من المنصة وأمطروا مالكوم بوابل من النيران وأردوه قتيلاً. ومن المفارقات أنه بعد شهر واحد من اغتيال مالكوم إكس، أقر الرئيس الأمريكي جونسون مرسوما قانونيا أقر فيه حقوق التصويت للسود، وأنهى الاستخدام الرسمي لكلمة "نجرو"، التي كانت تطلق على الزنوج في أمريكا. كانت وفاة مالك شباز نقطة تحول في سير حركة أمة الإسلام حيث تركها الكثيرون والتحقوا بجماعة أهل السنة وعرفوا دينهم الحق، وتغيرت كثير من أفكار جماعة أمة الإسلام خاصة بعد رحيل إليجا محمد وتولية والاس محمد الذي تسمى بوارث الدين محمد فصحح أفكار الجماعة وغير اسمها إلى [البلاليين] نسبة إلى بلال بن رباح رضي الله عنه، وجعل المسلمين أقرب ما يكونوا لصواب وكان كل ذلك صدى لأفكار ودعوة الداعية الصادق مالك شباز الذي خر صريعًا للدعوة لدين الله
http://ar.wikipedia.orروابط
. http://www.malcolm-x.org

انتبهوا ايها الرجال

2006-08-16T08:54:00.000-07:00

ايها الرجال المتزوجون انتبهوا زوجتكم بتقلبكم . ومفيش لفظ غير دة يدل على المعنى الى اقصدة . فعلا بعض الزوجات بتقلب ازواجهم بمعنى ان الزوجه تشترى حاجه ب 5 جنيه وتقولو دى ب15 جنيه او تقوله انا نفسى فى فستان ب400 وهو مثلا ب200 او تخنصر من مصروف البيت وتحوش على قفا جوزها وهو يعينى مش حاسس ونايم فى العسل. وقيس على كدة مصروف البيت والعيال وكل قرش يدخل ايدها والزوج الغلبان مطحون وهو فاكر ان الفلوس مش مقضيه والعيشه غلا ولكن السر ان الزوجه بتلعب دور النشال. وما بالك بقا اذا كانت الزوجه عامله بيزنس من وراء زوجها العزيز. والزوج بيقول ان مفيش اطيب ولا ارق ولا اصدق من مراته ويقول حاجه للنوع دة من الستات فى مثل بيقول مين امنك لم تخونه ولو كنت خاين ولا ايه . وبقول للرجاله انتبهو ايها الرجال

اوطان قديمه ... شعوب للبيع

2006-08-10T13:32:00.000-07:00

قريت فى الدستور شعر عجبنى لعمرو حسنى ولقيت نفسى حابه اكتبه لانه مناسب للنكبه الطارئه الى هيعملها العرب ويتفقو على الا يتفقو. المهم الشعر بيقول

معايا سلاطين عادة وولوكس

وملوك بتتجرجر فى البوكس

عمم وطرطير وطواقى

بخلاء وحاتم مش طائى

دقون لطاف ودقون بتعض

وجنرالات شنباتها تخض

معايا ناس مش زى الفل

مستانسه وادمنت الذل

معايا تبلوه للفنان

عيزرا شارون شيمون ديان

تابلوة لاشخاص سمر وبيض

لايق على حيطان المراحيض

حكام عرب ضاربين سلامات

ومشمرين البنطلونات

ومشلحين الجلابيات

حاضنين جزمهم تحت الباط

بيخوضوا فى دم الاطفال

من مسلمين او من اقباط

بيقولو قدام العدسات

وف كل نشرات الاخبار

ما فيش حلاوة من غير نار

مافيش سلام من غير اضرار

....

انا بابيع السا كسونيا

كراكيب فى صندرة الدنيا

واللى ما يشترى يتفرج

الاراجوزات هنا بتهرج

بتشدها خيوط وهميه

والدم سايل حنفيه

والمسرحيه بدون تصنيف

تراجيديا هزليه وتخريف

عنوانها كان كوميديا الموت

او كان كوميديا لحد الموت

مكتوب على هدد الجدران

وعلى غسيل مبلول بالدم

والمخرج المتكمن قال

الضحك عندى منك ليك

فى مسرح المريات والشمس

العرض بكرة زى الامس

حافرجك على نفسك بس

تقوم تموت على طول م الضحك

اوطان قديمه

شعوب للبيع

....

حافضل ادور طول عمرى والف

واشوف بعينى الناس بتتف

واسمع شتيمه بكل لغات

كل الامم فى البلكونات

وافضل ادور وادور والف

ولا حد يوم نفسه حتهف

مين يشترى بفلوسه الداء؟

عربيه الروبا بيكيا وباء

زى النفايه النوويه

ما لهاش مكان بين الاحياء

نظريه الكوز

2006-08-03T07:19:00.000-07:00

هى نظريه كل مواطن مطحون يكاد يكفى نفسه وعياله عيش حاف وكل شاب اتخرج ومش لاقى شغل ومش لاقى يتجوز. النظريه هى طالما انت عاجز عن تحقيق احلامك واحتيجاتك نتيجه للفقر ولان اليد قصيرة والعين بصيرة نط فى الكوز واحلم بكل الى انت عايزة. جرب كدة تنط فى الكوز وتحلم بانتخابات نزيهه بجد بمنافسه شريفه مش ضرب تحت الحزام , ببلدنا مفيهاش فساد ولا الكبار ينهبو فلوس الغلابه الى مش لاقين يكلو ومطحونيين زى الطور فى الساقيه , ان كل واحد له كرامته الى ماحدش يتعدى عليها , احلم بالحريه انك تقول رايك وانت مش خايف تتضرب على قفاك , انك تاخد حقك تالت ومتلت, احلم ان احنا عندنا قوة زى جارتنا العزيزة على قلب حكومتنا اسرائيل, احلم انك لما تقعد تتفاوض تكون القوة متساويه مش انك قاعد زى الفار خايف, احلم ان احنا مش شحتين مستنيين معونه من حد معونه بيخدو تمنها دم وحرب وخراب , احلم ان احنا دوله قويه وغنيه , احلم بالوحدة العربيه والى اسمه الدفاع العربى المشترك, احلم بتحرير فلسطين , وخروج ماما امريكا من العراق, دلوقتى هتفوق على قفى من مخبر يقولك هى نقصاك يا روح ...... النظريه دى من فيلم ظاظا . الفيلم لذيد بيناقش كل القضايه دى بشكل دمه خفيف

اغنيه المقاومه الاسرائيل

2006-07-29T13:05:00.000-07:00

سمعت اغنيه لمغنيه اسمها رانيا كردى مش عارفه ليه حسيت وانا بسمعها ان كلامها بيتوجه من المقاوم لاسرائيل( طبعا مع كل الاحترام للمقاومه الى رفعت راسنا ) ونفسى الناس فى بلادنا تغنيها للحكومه بس امتى هتغنيها موت يا قرد. والاغنيه للى ما سمعهاش كلماتها هى
شايف نفسك برضه شايفه نفسى وهوريك يا أسى نفسى وأعمل كل شىء فى نفسى .
جالك يوم عرفت أنى أدك ولا خفت منى قرب ليه بعدت عنى .
وجريلك أيه مالك بتبصلى كدة ليك. ليه مستغرب من ألى أنا فيه صبرك دة ألى عملته شويه.
خد منى كمان أوعى تفكر زى زمان هضعف وأبكى من الحرمان لا دأنت ألى صعبت عليا.
ليه ما تقولى بعدت عن مكانى قرب لسه عندى تانى وأنا دلوقتى جه زمانى ضعفى خلاص دة ماضى عدا وأتغيرت من النهاردة وأنا هثبت لك الكلام دأ

اتبرع وخالى عندك دم

2006-07-27T08:52:00.000-07:00

طريق التبرع لإعمار لبنان على حساب رقم
156156002 بنك مصر بكافة فروعه
أو الإتصال برقم 1410 من أى محمول

فى ذكرى التأ ميم

2006-07-26T10:27:00.000-07:00

تتواكب ذكرى تأميم قناة السويس مع العدوان الوحشى على لبنان وسط صمت عربى وتغطيه عربيه رهيبه .
ولقد لاحظت حاجه فى المظاهرات فى مصر ان الناس بترفع صوره نصر الله جنبا الى جنب مع صورة جمال عبد الناصر وذلك لانهما يمثلان رمز الكرامه العربيه الى مرمغها الحكام العرب فى التراب واصبحو تبعا لامريكا بس هما مايعرفوش ان المتغطى بيها عريان.المهم لما قرر جمال عبد الناصر تاميم القناة قامت الدنيا ازاى يعنى نتجرا ونطالب بحقوقنا وناخدها.وقام العدوان الثلاثى على مصر .مش عارفه ليه الموقف دة بيشبهنى بموقف حزب الله يعنى الغرب قال ازاى يخطف جنود اسرائيلين ؟هما مش عارفين ان دول محتلين لارضه وانه كانت العمليه دى علشان يحرر الاسرى . وبرضه قامت الدنيا على لبنان وادى اسرائيل بدك فيها والعرب حاطين . فى بقهم جزمه مقاس 45. فالله يرحم جمال عبد الناصر ويبارك وينصر نصر الله.

الغالى للغالى

2006-07-23T08:16:00.000-07:00

تتعامل الحكومه هذة الايام معنا من منطلق الغالى للغالى يعنى ان غلو الاسعار نتيجه لغلو قدرنا عند الحكومه وحبها الزائد لنا . ولكن اسال نفسى ليه ما تتعملش من منطلق الغالى يرخص للغالى . فعلى سبيل المثال زاد سعر تذكرة المترو على الرغم من ان المترو كترت فيه الاعلانات زى البوسترات على القطاروالمحطه الاذاعيه

فى القطار الى طبعا بتصدع الناس مش بتسليهم والاعلانات والاغانى الهيفه الى بنشوفها فى التلفزيونات الموجودة فى المحطات فيعنى المفروض ان سعر التذكرة يكون زى ماهو والخدمات تكون احسن دة على اساس ان الاعلانات بدخل فلوس. لكن عكس كدة حصل والسعر زاد والخدمه لسه زفت . والاسبوع الى بعديه زاد سعر البنزين وبالتالى سعر الموصلات ليه وازاى؟ محدش يعرف يمكن لان الناس مشغوله فى حكايه لبنان و مش هيتكلمو ممكن ليه لا واعتقد ان دى بدايه سلسله الغلا الى هيطحن الناس والناس كل الى بتعمله انها تدعى على الحكومه وصباح الخير يا غلا

2006-07-22T09:36:00.000-07:00

خيبه الامل ركبه جمل

2006-07-18T14:09:00.000-07:00

من ساعه بدايه الحرب على لبنان وانا زهقانه وقرفانه من الناس ومن نفسى بقت اعصابنا باردة وبقينا بنتفرج على الاخبار علشان نقول يا عينى اخص على كدة يا حرام وغيرها من العبارات وبعدين نقلب ونتفرج على اغنيه ولا فيلم معقوله احنا وصلنا لكدة . لا وكمان تطلع ناس من الرؤساء والزعماء ماءماء ويقولو ان حزب الله بيقود المنطقه لحافه الهاويه وان الى عمله مغامرة . صحيح ازاى حزب الله ياسر اثنين من اليهود الكلاب علشان يحرر الاسرى الى مليين السجون الاسرائيليه هما مايعرفوش ان ظفر الاسرائيلى ب15000 عربى ولا ايه لا اخص على حزب الله اخص ويطلع الى مش عارفه اسمه مع عمرو موسى بعد اجتماع وزراء الخارجيه وهو بيضحك ضحكه مش عارفه على ايه؟ يمكن على الخيبه القويه بقينا دلوقتى والحمد لله بعد ما كنا بنشجب ونددلا الصلى على النبى وصلنا لمرحله اكبر وهى ان احنا بقينا بنبرر لاسرائيل اللى بتعمله يا فرحتها بينا لما تسمع الرؤساء بيقولو ان على حزب الله تحمل نتيجه عمله وحدة . فتضرب اسرائيل

وتموت الاطفال والمدنيين يله ماهو يا فرعون ايه فرعنك قال مالقتش حد يلمنى . طب نساعد البنانيين وبعدين نعمل الى عايزينه فى حزب الله ولا ايه ولكن لفلسطين ولبنان الله ولنا جميعا الجحيم .

الله يرحم العرب

2006-07-17T11:49:00.000-07:00

2006-07-05T13:39:00.000-07:00

دعوة لمقاطعه شراء الصحف يوم الاحد

حريه بالمهلبيه

2006-06-30T10:06:00.000-07:00

قريت ان الاء الطالبه الى كانت هتدخل مادة العربى دور تانى لانها شتمت عمنا الكريم الحاج جورج بوش شوف ازاى
هتنجح وهتنقل للصف الثانى الثانوى ازاى وفين وامتى؟ ما اعرفش شوف والنبى بعد ما قالو هتسقط قالو هتدخل دور تانى وبعد كدة قالو
هتنجح والنبى ايه شغل العيال دة بس ما علينا احنا وخدين من الحكومه على كدة بس المهم ان البنت هتنجح ودة ليه اسالنى بقا؟اقولك علشان رئيسنا الى بيحمى الحريه والديموقراطيه اخد بالك انت معايا امر بانها تنجح لان دة رايها وهو بيشجع الديموقراطيه وعجبى؟
.طب والنبى بمناسبه المهلبيه سورى قصدى الديموقراطيه ممكن يفرج عن باقى المعتقلين فى قضيه القضاة بمناسبه حريه التعبير يعنى
وسلامو عليكم

درجه تانيه حتى فى الشيمه

2006-06-26T14:13:00.000-07:00

شاهدت حلقه منى الشاذلى مع الطالبه الاء الى شتمت جورج بيه بوش واتحرمت من النجاح وكانت هتعيد السنه لولا ان الحكومه حفظت ماء وجهها واكتفت بدخولها الدور الثانى طب ما شتمته شتمته وايه يعنى مايغور فى داهيه يعنى والنبى مهم ماعملوش حاجه لما شتمو سيدنا محمد اشمعنا بوش الى فاضيحه مغرقه الدنيا من ابوغريب لجوانتنامو ولا هما مش شيفين؟

طب ماشعبه بيشتمه كل يوم ولا احنا درجه تانيه حتى فى الشتيمه

ولسه ياما هنشوف من افتكسات الحكومه وعجبى؟

التنين راجع

2006-06-20T11:29:00.000-07:00

مبرررررروك التنين البمبى هيخرج يا رجاله

عقبال البقيين